میرے تعارف میں لکھنے کے لیے کچھ بھی ایسا منفرد اور قابلِ ذکر نہیں۔۔۔ میرا بس اتنا ہی تعارف ہے کہ میرا نام مائرہ انوار راجپوت ہے۔ قلم کو مشعل بنا کر اندھیرے بھگانا چاہتی ہوں،قلم تھام کر تلوار گرانا چاہتی ہوں۔ میرا تعلق جنوبی پنجاب کے ایک چھوٹے شہر کے روایتی مشرقی گھرانے سے ہے جہاں تعلیم حاصل کرنا اپنے آپ میں ایک معرکہ ہے۔ میرے پاس ساتھ لگانے کے لیے کوئی بڑا حوالہ موجود نہیں سوائے اپنے لکھے لفظوں کے۔ میں نے جو لکھا، جتنا لکھا وہی میرا حوالہ ہے۔ اس بات کے کہنے کا مقصد یہ نہیں کہ میں بڑا حوالہ نہ ہونے پر شرمندہ ہوں۔ مجھے فخر ہے کہ میں ایک ایسے باپ کی بیٹی ہوں جنہوں نے ناخواندہ ہونے کے باوجود ہماری پرورش ایک خواندہ اور آزاد ماحول میں کی، ہمیں اڑنے کے لیے کُھلا آسمان دیا۔۔

اپنے بچپن سے ہی میں نے سمجھ لیا تھا کہ مجھے وہ سب سنائی دیتا ہے جو لوگ کہتے نہیں ہیں پر کہنا چاہتے ہیں۔ مجھے وہی سب لکھ کر پیش کرنا ہے۔۔۔ لکھنا میرا خواب ہے صرف اتنا کہنا ناکافی ہوگا۔ کسی سہولت، حوالے، تجربے اور رہنمائی کے بغیر میں جس جہد سے یہاں تک آئی ہوں میں خوب جانتی ہوں کہ اس سے دوگنی چوگنی جہد مجھے آگے جانے کے لیے کرنی ہوگی لیکن میں تیار ہوں۔